ഫിലിപ്പോസ് ഫിലിപ്പ് ഫൊക്കാന ലീഗല്‍ ചെയര്‍മാന്‍
ന്യൂയോര്‍ക്ക് : ഫൊക്കാന മുന്‍ സെക്രട്ടറി ഫിലിപ്പോസ് ഫിലിപ്പിനെ ഫൊക്കാന ലീഗല്‍ അഡൈ്വസറി ചെയര്‍മാന്‍ ആയി നിയമിച്ചതായി പ്രസിഡന്റ് സജിമോന്‍ ആന്റണി അറിയിച്ചു. റോക്ക് ലാന്‍ഡ് കൗണ്ടിയിലെ ക്‌ളാര്‍ക്‌സ്ടൗണ്‍ ടൗണിന്റെ ട്രാഫിക് ആന്‍ഡ് ട്രാഫിക്ക് ഫയര്‍ സേഫ്റ്റി അഡൈ്വസറി ബോര്‍ഡ് അംഗമായ അദ്ദേഹം ഫൊക്കാനയുടെ മുന്‍ സെക്രട്ടറി, ട്രസ്റ്റീ ബോര്‍ഡ് ചെയര്‍, എക്‌സിക്യൂട്ടീവ് വൈസ് പ്രസിഡന്റ്, കണ്‍വെന്‍ഷന്‍ ചെയര്‍ തുടങ്ങിയ പദവികള്‍ വഹിച്ചിട്ടുള്ള വ്യക്തികൂടിയാണ്.
ഫൊക്കാനയുടെ ആല്‍ബനി കണ്‍വന്‍ഷന്‍ ഒരു വമ്പിച്ച വിജയമാക്കി തീര്‍ത്തതില്‍ കണ്‍വെന്‍ഷന്‍ ചെയര്‍ എന്ന രീതിയില്‍ ഫിലിപ്പോസ് ഫിലിപ്പിന്റെ പ്രവര്‍ത്തനം പ്രശംസനീയമാണ്. സാധാരണ പ്രവര്‍ത്തകനായാലും ഭാരവാഹിയായാലും ഏല്‍പ്പിക്കുന്ന ദൗത്യം വിജയിപ്പിക്കുക എന്നത് അദ്ദേഹത്തിന്റെ രീതിയാണ്. ആ പ്രവര്‍ത്തന രീതിയാണ് അദ്ദേഹത്തെ ഏവര്‍ക്കും സര്‍വ്വ സമ്മതനാക്കുന്നത്. 1989 മുതല്‍ ഇന്നുവരെ ന്യൂയോര്‍ക്കിലെ ഒരു പ്രമുഖ സംഘടനയായ ഹഡ്സന്‍ വാലി മലയാളി അസ്സോസിയേഷന്റെ പ്രസിഡന്റ്, ചെയര്‍മാന്‍, കേരള ജ്യോതി ചീഫ് എഡിറ്റര്‍ തുടങ്ങിയ വിവിധ നിലകളില്‍ പ്രവര്‍ത്തിച്ചിട്ടുള്ള അദ്ദേഹം ഇന്ത്യന്‍ കോണ്‍സലേറ്റുമായി സഹകരിച്ച് വിസ, ഒസിഐ ക്യാമ്പുകള്‍ സംഘടിപ്പിക്കുന്നതിനും മലയാളീ കമ്യൂണിറ്റിക്കു ഉപകാരപ്രദമായ നിരവധി പ്രവര്‍ത്തനങ്ങള്‍ക്കു മുന്‍കൈയെടുത്ത വ്യക്തികൂടിയാണ്.
കേരള എഞ്ചിനിയേഴ്സ് അസോസിയേഷന്‍ ഓഫ് നോര്‍ത്ത് അമേരിക്ക (KEAN)യുടെ സ്ഥാപകരില്‍ ഒരാളാണ്. ആ സംഘടനയിലും പ്രസിഡന്റായും ബോര്‍ഡ് ചെയര്‍മാനായും സേവനമനുഷ്ഠിച്ചിട്ടുള്ള അദ്ദേഹം എഞ്ചിനിയര്‍മാരുടെ നെറ്റ്വര്‍ക്ക് സംഘടന എന്നതിലുപരി എഞ്ചിനീയറിംഗ് വിദ്യാലയങ്ങളിലെ സാമ്പത്തിക ബുദ്ധിമുട്ടനുഭവിക്കുന്ന അനേകം വിദ്യാര്‍ത്ഥികളുടെ പഠനച്ചിലവ് വഹിക്കുന്ന പദ്ധതികള്‍ ഏറ്റെടുത്തു നടത്തിവരുന്നുണ്ട്.
മലങ്കര ഓര്ത്തഡോക്സ് സഭയുടെ മാനേജിംഗ് കമ്മിറ്റി അംഗമായി പ്രവര്‍ത്തിച്ചിട്ടുള്ള അദ്ദേഹം മലങ്കര ഓര്ത്തഡോക്സ് സഭയുടെ നോര്‍ത്ത് ഈസ്റ്റ് അമേരിക്കന്‍ ഭദ്രാസനത്തിന്റെ കൗണ്‍സില്‍ അംഗമായിരുന്നു. റോക്ക്ലാന്‍ഡ് കൗണ്ടി റിപ്പബ്ലിക്കന്‍ പര്‍ട്ടിയില്‍ കമ്മിറ്റിയംഗമായി പ്രവര്‍ത്തിക്കുന്നതോടൊപ്പംന്യൂയോര്‍ക്കിലെ പബ്ലിക്ക് എംപ്ലോയീസ് ഫെഡറേഷനില്‍ ഡിവിഷന്‍ സെക്രട്ടറിയായും പ്രവര്‍ത്തിച്ചിരുന്നു. കേരളത്തില്‍ നിന്നും എഞ്ചിനീയറിംഗ് ബിരുദവും ന്യൂയോര്‍ക്ക് പോളിടെക്ക് യൂണിവേഴ്സിറ്റിയില്‍ നിന്നും ഇലക്ട്രിക്കല്‍ എഞ്ചിനീയറിംഗില്‍ ബിരുദാനന്തര ബിരുദവും നേടിയിട്ടുള്ള ഫിലിപ്പോസ് ഫിലിപ്പ് ന്യൂയോര്‍ക്ക് റോക്ക്ലാന്‍ഡില്‍ കുടുംബസമേതം താമസിക്കുന്നു.
ഫൊക്കാന ലീഗല്‍ അഡൈ്വസറി ചെയര്‍മാന്‍ ആയി നിയമിച്ച ഫിലിപ്പോസ് ഫിലിപ്പിനെ ഫൊക്കാന പ്രസിഡന്റ് സജിമോന്‍ ആന്റണി , സെക്രട്ടറി ശ്രീകുമാര്‍ ഉണ്ണിത്താന്‍ , ട്രഷര്‍ ജോയി ചാക്കപ്പന്‍, എക്‌സി . പ്രസിഡന്റ് പ്രവീണ്‍ തോമസ് , വൈസ് പ്രസിഡന്റ് വിപിന്‍ രാജു, ജോയിന്റ് സെക്രട്ടറി മനോജ് ഇടമന, ജോയിന്റ് ട്രഷര്‍ ജോണ്‍ കല്ലോലിക്കല്‍, അഡിഷണല്‍ ജോയിന്റ് സെക്രട്ടറി അപ്പുകുട്ടന്‍ പിള്ള, അഡിഷണല്‍ ജോയിന്റ് ട്രഷര്‍ മില്ലി ഫിലിപ്പ് , വിമന്‍സ് ഫോറം ചെയര്‍പേഴ്‌സണ്‍ രേവതി പിള്ള, ട്രസ്റ്റീ ബോര്‍ഡ് ചെയര്‍ ജോജി തോമസ് എന്നിവര്‍ അഭിനന്ദിച്ചു.