Blog

തിരുവനന്തപുരം.അമേരിക്കൻ മലയാളികളുടെ ഏറ്റവും വലിയ സംഘടനയായ ഫൊക്കാനയുടെ പുതിയ പ്രസിഡന്റ് ഡോ.ബാബു സ്റ്റീഫന് കേരളം അവിസ്മരണീയമായ വരവേൽപ്പ് നൽകി.നാലു പതിറ്റാണ്ടു നീളുന്ന ഫൊക്കാനയുടെ ചരിത്രത്തിൽ ഒരു പ്രസിഡന്റിനും ലഭിക്കാത്ത സ്വീകരണമാണ് പ്രസിഡന്റ് പദവിയിലേക്ക് തിരഞ്ഞെടുക്കപ്പെട്ടശേഷം ആദ്യമായി കേരളത്തിലെത്തിയ വേളയിൽ ബാബു സ്റ്റീഫന് ലഭിച്ചത്.

കഴിഞ്ഞ നാൽപ്പതുവർഷമായി അമേരിക്കയിൽ വ്യവസായിയും സാമൂഹ്യപ്രവർത്തകനുമെന്ന നിലയിൽ പ്രവർത്തിക്കുന്ന ബാബു സ്റ്റീഫന്റെ സേവനം അമേരിക്കൻ മലയാളി സമൂഹത്തിന് ഒരു അംബാസിഡറുടേതെന്ന പോലെ വിലമതിക്കാനാവാത്തതാണെന്ന് പ്രമുഖ സന്നദ്ധ സംഘടനയായ കേരളീയം തിരുവനന്തപുരത്തൊരുക്കിയ സ്വീകരണച്ചടങ്ങിൽ പങ്കെടുത്ത വിശിഷ്ടാതിഥികൾ അഭിപ്രായപ്പെട്ടു.കേരള ഗവർണർ ഡോ.ആരിഫ് മുഹമ്മദ് ഖാനാണ് സ്വീകരണ സമ്മേളനം ഉദ്ഘാടനം ചെയ്തത്. പാവപ്പെട്ട വിദ്യാർത്ഥികൾക്ക് സൗജന്യമായി ടാബുകൾ വിതരണം ചെയ്യുന്ന കേരളീയം പദ്ധതിയുടെ ഉദ്ഘാടനവും ഗവർണർ തദവസരത്തിൽ നിർവഹിച്ചു.കേരളത്തിനും അമേരിക്കൻ മലയാളികൾക്കുമിടയിൽ ഒരു പാലം പോലെയാണ് ഫൊക്കാന പ്രവർത്തിക്കുന്നതെന്നറിയുന്നതിൽ സന്തോഷമുണ്ടെന്ന് പ്രസിഡന്റ് ബാബു സ്റ്റീഫനെ അനുമോദിച്ചുസംസാരിക്കവെ ആരിഫ് മുഹമ്മദ് ഖാൻ പറഞ്ഞു.

ബാബു സ്റ്റീഫനെപ്പോലെ കർമ്മനിരതനും യോഗ്യനുമായ ഒരാൾ ഫൊക്കാനയുടെ തലപ്പത്തെത്തുന്നത് ഏറെ പ്രയോജനകരമാകുമെന്നും ഗവർണർ പറഞ്ഞു.ബാബു സ്റ്റീഫനെ പൊന്നാടയണിയിച്ച ഗവർണർ അദ്ദേഹത്തിന് ഉപഹാരവും സമ്മാനിച്ചു.ഫൊക്കാനയുടെ ഉപഹാരം ജനറൽ സെക്രട്ടറി ഡോ.കലാ ഷഹി ,മുൻ ട്രഷറർ തോമസ് കെ.തോമസ്, ട്രഷറർ ബിജു കൊട്ടാരക്കര എന്നിവർ ചേർന്ന് ഗവർണർക്ക് സമർപ്പിച്ചു.